Asnjë shqiptar nuk gjendet në Federatën e Basketbollit të Ma

Shkup, 20 prill - Federata e Basketbollit të Maqedonisë (FBM) ngjashëm sikur FVM-ja funksionon pa asnjë shqiptar të punësuar në këtë institucion. Siç mësojmë nga drejtori sportiv i FBM-së, Ilija Merxhanovski, në këtë institucion janë të punësuar vetëm dy punonjës maqedonas, ndërsa në organet udhëheqëse siç janë Këshilli Drejtues (KD) dhe komisionet tjera nuk ka asnjë punëtor sportiv shqiptar.
Edhe pse ende nuk gjendet asnjë shqiptar në FBM, drejtuesit e këtij institucioni fillojnë t’i injorojnë kërkesat e tyre. “Dyert për shqiptarët janë të hapura. Kemi nevojë për inkuadrimin të kuadrove shqiptarë në federatë, por ata duhet të jenë njerëz që do të sjellin para, pra të jenë afaristë. Kemi biseduar me disa afaristë shqiptarë, por bisedimet kanë dështuar. Ata nuk kanë qenë të interesuar për të investuar në basketboll”, tha Merxhanovski.
Ai pranon se në FBM meritojnë të qëndrojnë njohësit e mirë të basketbollit si Muntaz Allajbegu, Faton Ismaili, Enver Sllamniku dhe tjerët, por mendjen e ka vetëm te paratë. Nga ana tjetër afaristi i njohur Enver Maliqi dy vjet ka qenë anëtar i KD-së të FBM-së dhe pohon se aty nuk ka asnjë lloj mikpritje për shqiptarët. “Nëse ke para mund të jesh pjesë e FBM-së. Besoj se kemi kuadro që mund të punojnë në këtë federatë, por nuk ka interesim nga ana e federatës që të punësojnë shqiptarë. Mendoj që duhet të formohen klube shqiptare të basketbollit, të cilat do të garojnë në elitën e basketbollit. Atëherë do të jetë shumë më lehtë të inkuadromi në federatë. Kemi afaristë që mund të financojnë një ose disa klube shqiptare”, tha për “Lajm”, Maliqi.
Kryetari i FBM-së, Daniel Dimevski gjatë intervistës tonë ka qenë në udhëtim zyrtar në Zagreb edhe përkundër arsyetimeve brenda shtëpisë së basketbollit se nuk kanë asnjë metelik.
Trajnerët dhe njohësit shqiptarë të basketbollit edhe më tutje nuk kanë qasje në FBM. Asnjë klub shqiptar aktualisht, nuk garon në Superligën e basketbollit të Maqedonisë.