Përfaqësuesja e Kosovës në basketboll para udhëtimit në Jord

Përfaqësuesja e Kosovës në basketboll prej të hënës ka filluar përgatitjet para nisjes për në Jordani ku do të jetë pjesëmarrëse në turneun “Kupa e Mbretit Abdullah II”, që mbahet prej datës 16 deri më 24 nëntor. Krerët e basketbollit kosovar çuditërisht kanë vendosur që këto përgatitje t’i zhvillojnë në ambientet e Shkollës Policore në Vushtrri. Duket se ata janë entuziazmuar me përgatitjen e policisë në këtë shkollë, ku më parë vetëm për 7 javë mund të bëheshe polic i SHPK-së, dhe ka vendosur që edhe basketbollistët e Kosovës të përgatiten në këtë shkollë në mënyrë që në Jordani të jenë sa më të përgatitur dhe të bëjnë një paraqitje të denjë të basketbollit kosovar. Numri 1 i FBK-së, Erold Belegu, ka shpjeguar që kushtet financiare kanë qenë arsyeja kryesore pse Përfaqësuesja e Kosovës në basketboll ka vendosur të përgatitet në Shkollën Policore në Vushtrri. “Dihet që Federata jonë nuk ka mjete të mjaftueshme materiale. Kjo shkollë ka pranuar të jetë nikoqire e jona pa asnjë kompensim dhe kjo është arsyeja e vetme pse kemi vendosur të përgatitem në Vushtrri. Ushqimi dhe fjetja do të jenë gratis dhe kushtet për punë janë optimale, si dhe mund të punohet në qetësi më të madhe. Kjo ka qenë një ndihmë e madhe për ne, kur dihet se në çfarë situate financiare jemi”, tha Belegu.
Serbi i vetëm në Përfaqësuesen e Kosovës, Nenad Stojanoviq, nuk ka qenë i pranishëm në ditën e parë të grumbullimit në Vushtrri, por ai pritet të bashkohet të martën me kolegët. “Për shkaqe objektive Nenad nuk ka mundur të na bashkohet të hënën, por ai gjithsesi do të na bashkohet të martën në mëngjes”, tha zëvendëstrajneri i Përfaqësueses së Kosovës në basketboll, Albert Sylejmani.
Pritet që para nisjes për në Jordani, pikërisht të enjten, Kosova të zhvillojë një ndeshje miqësore me basketbollistët e huaj që luajnë në Kosovë, të cilët do t`i udhëheqë trajneri i AS Prishtina Rudolf Jugo.
Nga 17 basketbollistët e përfaqësueses, 12 do të seleksionohen nga ushtruesi i detyrës së selektorit, Arben Krasniqi, për turneun e Jordanisë, ndonjëri që mbetet jashtë listës mund të vazhdojë “trajnimin për polic”!