Në rast se Kosova pranohet në FIBA, Kupa e Promocionit sikur

Erolld Belegu, kryetar i Komisionit të Përkohshëm të Federatës së Basketbollit të Kosovës (FBK), e ka takuar në Shqipëri drejtorin ekzekutiv të FIBA Europe, Nar Zanoli, ku është mbajtur Kupa e Promocionit. Belegu dhe sekretari i Komisionit, Isuf Lumi, kanë takuar drejtues të FIBA Europe, me ç’rast i kanë njoftuar ata për basketbollin e Kosovës. Sipas Belegut, ky ishte vetëm një prezantim.
“Ne kemi bërë një njoftim rreth basketbollit kosovar dhe e kemi shikuar mundësinë e përgatitjes për pranim të shpejtë në FIBA. Normalisht, e kemi ditur se në këtë takim nuk do të na mundësohet menjëherë pranimi në FIBA, por ne thjesht kemi bërë një prezantim dhe njoftim. Po ashtu, e kemi përgatitur edhe një video cd (DVD) mbi informatat për basketbollin e Kosovës, një informim të përgjithshëm, si dhe një shkresë që i kemi bërë FIBA Europe”, tha Belegu, i cili personalisht ka biseduar me Zanolin.
“Ka qenë takim i frytshëm dhe ata janë informuar shumë për Kosovën, meqë kanë pasur shumë pak informata për ne. Zanolin ka qenë shumë i këndshëm në bisedime, madje në rast se pranohemi kemi biseduar edhe për mundësinë që në vitin 2008 të jemi ne organizator të Kupës së Promocionit”, tha Belegu, i cili ka pasur takime edhe me komisarin e garave të FIBA Europe dhe zyrtarë të tjerë të këtij asociacioni. Atij, madje, i është premtuar se do të shikohet materiali.
Takimi i ekspeditës kosovare me zyrtarë të FIBA-s, seksioni i Evropës, është mundësuar falë Kupës së Promocionit, të mbajtur këto ditë në Shqipëri. Me zyrtarët e FIBA-s kishte pasur takime edhe ish-kryesia e mëparshme e FBK-së, të cilët edhe kishin bërë kërkesa disa herë për pranim në FIBA Europe, ndëra rastin e patën ngritur edhe në Gjyqin ndërkombëtar arbitrar të sportit, por pa ndonjë sukses.