Drejtorati i Siguria Superligës dhe klubet do të lobojnë pë

Drejtorati i Siguria Superligës të basketbollit, në bashkëpunim me klubet, do t’i propozojë Bordit të Federatës së Basketbollit krijimin e një grupi për lobim në FIBA. Këtë e tha Nuredin Ibishi, drejtor i Siguria Superligës, i cili ka marrë pëlqimin e klubeve pas një kontrolli që i ka bërë Komisioni për verifikimin e gjendjes dhe strukturave menaxhuese të klubeve të Superligës në basketboll, në përbërje të Artan Çerkinit, Nuredin Ibishit dhe Valdet Spahisë.
“Është një propozim i klubeve dhe Drejtoratit të Siguria Superligës që të bëhet një ekip i fortë nga menaxhmenti i drejtorëve të ekipeve më të suksesshme në këtë drejtim në menaxhimin e klubeve. Po ashtu, do të jenë anëtar edhe nga Superliga dhe nga FBK-ja. Qëllimi i këtij ekipi është që të lobojmë direkt me FIBA-n lidhur me ndërkombëtarizimin e basketbollit”, tha Ibishi. Ai është ngopur me mënyrën korresponduese të kontaktit me FIBA-n vetëm nëpërmjet letrave dhe mendon se kjo mënyrë është kot.
“Kështu përmes letrave nuk po ka sukses. Ne e dimë se do të jemi të pranuar kur të zgjidhet statusi i vendit, por të bëjmë diçka të vlefshme në këtë kohë, njësoj siç ka bërë edhe futbolli me takimet e tyre në FIFA. Në të njëjtën mënyrë si ka gjetur depërtim futbolli, edhe ne do të gjejmë njerëz”, tha ai.
Para dy vjetësh, një delegacion i klubeve të së ashtuquajturës Liga Profesionale e Basketbollit ishte takuar me zyrtarë të ligës rajonale “Good Year”, të cilët, sipas Ibishit, i kanë sugjeruar që të mundohen ta shfrytëzojnë këtë vakuum për ndonjë aktivitet të karakterit ndërkombëtar.
“Ata dinë shumë për basketbollin e Kosovës. Paramendo, na patën pyetur ‘a po pikë më kulmi i sallës në Prishtinë’. Janë shumë të njoftuar dhe na patën thënë që të mundohemi të bëjmë diçka si liga rajonale, iniciativë kjo që ende do të vazhdojë”, tha ai.
Pas përfundimit të Kampionatit, Drejtorati i Superligës do ta vazhdojë iniciativën me turnetë rajonalë, siç bëmë për nder të 28 Nëntorit. “Do të shohim të sjellim ndonjë skuadër sërish nga vendet e rajonit dhe një nga Bullgaria”, tha Ibishi.
B. Mehmeti