Basketboll - gjashtë xhiro para play-offit, skuadrat me ambi

Basketbollistët legjionarë po i kthehen kampionatit kosovar të basketbollit, gjashtë xhiro para se të fillojë play-offi, ku fut në zjarr gjashtë skuadrat e para, derisa edhe dy të fundit luftojnë për ekzistencë në Siguria Superligë. Gjashtë prej tetë ekipeve kanë paralajmëruar se do të kenë përforcime.
Skuadra e fundit që së paku synon mbetjen në ligë ka kryer tri transfere brenda dy javëve. Kastrioti ka marrë kroatin Igor Gjerman dhe boshnjakun Nexhat Spahiq, dhe synon edhe një kroat tjetër Ante Xhepina. Edhe Vëllaznimi ka po të njëjtat ambicie, mbetjen dhe play-offin dhe ka finalizuar kalimin e Dejvis Begajt, objektiv që e kishin në fillim të sezonit, dhe ka marrë edhe basketbollistin nga Bosnja Abdurahman Kahrimanoviq. Bashkimi ditë më parë ka angazhuar basketbollistin shqiptar nga Maqedonia Elber Aliun.
Kjo ka alarmuar edhe pjesën tjetër të skuadrave, të cilat synim kanë titullin. “Gjithsesi do të ketë përforcime te Peja. Skuadrës i mungon një lojtar i qendrës”, tha Gazmend Popovci, sekretari i KB Pejës.
Trepça që synon pozitën e katërt në play-off, ka përmendur katër lojtarë që do të mund të jenë pjesë e skuadrës. “Ende s’kemi vendosur decidivisht se kë do të marrim, por kemi në opsion, pos Fikret Hanxhiqit edhe dy ish-lojtarët Marko Zhorzh dhe Igor Miliçiq, si dhe një qendër”, tha Linda Shala, kryetare e klubit të Trepçës.
Të njëjtën porosi dërgon edhe Sigal Prishtina, e pozicionuar e dyta. “Patjetër do të përforcohemi. Kemi nevojë për pozitën 4 dhe 5 për t’i bërë ballë Mabetexit dhe Pejës”, tha Veton Kajtazi, anëtar i Bordit të klubit. “Do të presim protezat e Mabetexit dhe Pejës se çfarë do të bëjnë. Emrat për momentin nuk janë në opsion”, tha Kajtazi, duke pohuar se lojtari që ka zhvilluar vetëm një ndeshje me Sigal Prishtinën, Milan Parezanoviq, është lojtar i tyre.
Dy skuadrat që nuk kanë apetite për “legjionarë” dhe përforcime janë Mabetex dhe Drita. “Për momentin nuk jemi duke menduar në përforcime të tjera. Kemi skuadrën e kompletuar dhe ende është herët”, tha Gëzim Mehmeti, drejtor i aktiviteteve sportive pranë Mabetex. Drita nuk mendon në përforcime për shkak se klubi qëndron dobët financiarisht. “Klubi në këtë situatë që është, nuk ka mundësi. Jemi shumë të dobësuar materialisht pas largimit të sponsorit”, tha Besnik Bekteshi, drejtor i skuadrës gjilanase, që në pjesën e parë të kampionatit i ka frikësuar të gjitha skuadrat me blerje.