Maqedonia lëshon pe, negocion për vizat

Shkup, 8 janar - Maqedonia do të tregohet më "zemërgjerë" me Shqipërinë. Edhe pse vendosi të ndryshojë regjimin e vizave me Shqipërinë, pas hyrjes në fuqi të Ligjit për pajisjen me viza të shtetasve të huaj, ministritë e Punëve të Jashtme të dy vendeve janë në negociata për të lehtësuar procedurat aktuale të aplikimit, të ngjashme me ato të vendeve të BE-së. Në Ministrinë e Punëve të Jashtme pohojnë se këto bisedime kanë nisur dhe do të vazhdojnë deri në marrjen e një vendimi të përbashkët, gjë që do të reduktojë rigorozitetin e rregullores së re. Ndonëse nuk jepen hollësira lidhur me atë se çfarë nënkupton "lehtësim i procedurave", mësohet se ndër të tjera mund të ndryshojë çmimi i vizave që supozohet të jetë më i ulët, mënyra e dhënies, kohëzgjatja e të tjera. "Çdo deklaratë përpara përfundimit të negociatave do të ishte spekulim, por mund të thuhet se regjimi nuk do të jetë aq rigoroz sa duket. Dy ministritë janë në bisedime dhe do të përfshijnë shumë pyetje, të cilat lidhen me eliminimin e pasojave për qytetarët e të dyja vendeve dhe lëvizjen e lirë të tyre", thotë zëdhënësi i Ministrisë së Jashtme, Sasho Kokallanov. Edhe në një komunikatë të Ministrisë së Punëve të Jashtme të Shqipërisë sqarohet se ndryshimi i procedurës së marrjes së vizës për hyrjen në territorin e Maqedonisë nuk është ende i formës përfundimtare dhe se diskutimet mes dy palëve lidhur me këtë çështje vijojnë, ndërsa gjithçka do të bëhet publike në mbyllje të tyre.
Verdikti i Maqedonisë për kthimin e procedurës për marrjen e vizave në ambasada, e jo në kufij siç ishte deri më tani, është cilësuar si regres dhe kthim i një regjimi të vjetër për Tiranën zyrtare. Madje kryetari i Komisionit për politikë të jashtme të Parlamentit të Shqipërisë, Preç Zogaj, shpreh çudinë për marrjen e këtij vendimi të njëanshëm nga ana e Maqedonisë, sidomos në momentet kur negociatat mes dy vendeve të nisura në muajin dhjetor ende nuk kanë përfunduar. Kreu i Komisionit të Jashtëm pranon se shteti maqedonas është i lirë të marrë vendime për vendin e tij, por për rastin konkret duhet të bisedojë me Shqipërinë, pasi sipas tij, marrëdhëniet mes dy vendeve kanë qenë të mira. "Por, një vendim i tillë nuk mund të merret në mënyrë të njëanshme dhe nëse do të ndodhte kjo, atëherë pala shqiptare do të dëshpërohej mjaft", ka thënë Zogaj. Ai është shprehur kundër kthimit të përgjigjes me të njëjtën monedhë nga ana e Shqipërisë, duke theksuar se lëvizja e lirë është në interes të individëve, por edhe të dy vendeve. Edhe mediat shqiptare kanë raportuar për reagimet e shumta, të cilët kanë paralajmëruar se, më së shumti dëm me këtë vendim do të kenë turistët dhe biznesmenët, të cilët shpesh udhëtojnë në Maqedoni.
Por në Ministrinë Punëve të Jashtme pohojnë se pretendimi se ky është një vendim i njëanshëm nuk është i drejtë dhe nuk ka të bëjë me marrëdhëniet mes dy vendeve. "Nuk mund të quhet vendim, as masë ndëshkuese, por hyrje në fuqi e një ligji dhe çdo ligj në vetvete është i njëanshëm, miratohet nga Parlamenti i çdo vendi. Ky ligj nuk përshtatet me Shqipërinë, ose me vende të tjera, por përshtatet me standardet e BE dhe plotësimin e detyrimeve që ka çdo vend për përafrimin e legjislacionit vendës me atë evropian", thonë në Ministrinë e Jashtme të Maqedonisë.

Viza për 140 shtete
Nga muaji shkurt i këtij viti viza e Maqedonisë do të aplikohet për 140 shtete. Të huajt që duan të hyjnë në Maqedoni duhet ti plotësojnë të gjitha kushtet si ato që nevojiten për marrjen e vizës shengen për në Bashkimin Evropian. Vizë nuk nevojitet për qytetarët e ish-Jugosllavisë, si dhe për 50 shtete tjera perëndimore. "Para së gjithash duhet të vërtetohet qëllimi i udhëtimit në Maqedoni, zakonisht kërkohen të gjitha ato kushte që BE i kërkon nga vendet e treta", ka deklaruar Savo Sërbinovski, përfaqësues i Drejtorisë për çështje konsullore në Ministrinë e Jashtme