Gruevski-Thaçi rregullojnë çështjen e vizave

Shkup, 11 janar - Partnerët e koalicionit qeverisës janë dakorduar për të prolonguar aplikimin e Ligjit për të huaj, që nënkuptonte regjim të ri vizash edhe për qytetarët e Shqipërisë. Qeveria ka konfirmuar se do të gjendet mënyrë e prolongimit të përkohshëm të aplikimit të Ligjit për të huajt deri në takimin e nivelit të lartë ndërqeveritarë, që do të realizohet në muajin shkurt në Tiranë. Për këtë çështje është realizuar një takim mes kryetarit të PDSH-së, Menduh Thaçi dhe kryeministrit Gruevski, ku janë marrë vesh për tejkalimin e këtij problemi. Zëdhënësi qeveritar, Ivica Bocevski tha se Qeveria në mbledhjen që do të mbahet javën e ardhshme do të rishikojë vendimin e fundit për regjimin e ri të vizave me Shqipërinë. Ai tha se do të gjenden modalitete për tejkalimin e kësaj situate. Zëdhënësi i Qeverisë Ivica Bocevski tha sot se Qeveria e Maqedonisë e kupton shqetësimin e Qeverisë shqiptare lidhur me çështjen e lidhur me vizat, për shkak se sipas tij, edhe Maqedonia ka qenë viktimë e politikës së vizave të vendeve të tjera gjatë periudhës së kaluar.
"Ligji i ri për qëndrim të të huajve është një ligj me flamur evropian dhe me këtë ligj Maqedonia implementon direktivat dhe rregulloret evropiane. Ky ka qenë një nga projektet kyçe për liberalizimin e regjimit të vizave", theksoi Bocevski.Sipas tij, për Maqedoninë interes i veçantë është të sigurojë komunikim të pandërprerë midis qytetarëve të saj dhe qytetarëve të Shqipërisë, nëpërmjet komunitetit të bizneseve, intensifikimi i shkëmbimit tregtar, bashkëpunimit kulturor, arsimor dhe në sfera të tjera. Ai njoftoi se në mbledhjen e ardhshme të Qeverisë do të rishikohen masat për tejkalimin e kësaj situate, ndërsa sipas tij, në takimin e ardhshëm në Tiranë midis kryeministrit Nikolla Gruevskit dhe atij shqiptar Sali Berisha do të jetë e hapur edhe kjo çështje dhe të dy kryeministrat do të tentojnë të gjejnë zgjidhje afatgjate për regjimin e ri të vizave midis dy vendeve. Kundër regjimit të paralajmëruar kanë reaguar BDI, PDD dhe partitë tjera shqiptare, si dhe asociacione ekonomike.
Ndërkaq, ministri shqiptar i ekonomisë Gen Ruli, gjatë vizitës së djeshme në Shkup ka deklaruar se fillimi i zbatimit të regjimit të ri të vizave me Republikën e Shqipërisë do të ndikonte negativisht në shkëmbimet tregtare.

Gruevski te Berisha
Kryeministri Nikolla Gruevski muajin e ardhshëm do të zhvillojë vizitë zyrtare në Tiranë me ftesë të homologut të tij shqiptar, Sali Berisha.
Zyrtarë të lartë qeveritarë kanë njoftuar se në këtë takim, çështja e aplikimit të vizave për shtetasit shqiptarë, bashkëpunimi mes dy vendeve, integrimet euroatlantike si dhe Kosova do të jenë disa nga temat kryesore të axhendës së bisedimeve. Sipas zëvendëskryeministrit të qeverisë, Imer Aliu, vizita e planifikuar e kryeministrit maqedonas është parashikuar të realizohet nga mesi i muajit shkurt. Para vizitës në Tiranë, kryeministri Gruevski më 23 janar do të qëndrojë për vizitë zyrtare në selinë e NATO-s në Bruksel, ku do të zhvillojë takime me sekretarin e përgjithshëm Jap de Hop Shefer dhe me zyrtarë të lartë të NATO-s.