Visar Ganiu, nuk di t’u thotë JO titujve

Koha: FFM-ja ju shpalli trajner më të mirë për kategoritë e reja. Sa jeni i kënaqur me arritjet gjatë vitit që lamë?

Ganiu: Jam i kënaqur për arsye se arritëm të shpallem kampion i dyfishtë (Kampionatin dhe Kupën e Maqedonisë) me gjeneratën e kadetëve, ndërsa u nominuam edhe si ekip më i mirë për vitin që lamë. Për këtë sukses meritë të posaçme kanë lojtarët, por edhe unë si trajner. Edhe pse ky çmim ndoshta është i vonshëm, sepse gjatë katër viteve të kaluara kam qenë finalist në Kupë, prapë se prapë e vlerësoj shumë këtë titull.

Koha: Është ky çmimi i parë që keni arritur të fitoni ose keni fituar edhe më herët?

Ganiu: Kam fituar disa çmime, mirëpo ky i fundit nga Federata e Futbollit të Maqedonisë në bazë të nivelit është çmimi më i lartë. Shpresoj se nuk do të jetë i fundit, por do të ketë edhe shumë çmime tjera.

Koha: Aktualisht po udhëhiqni kadetët e Sllogës. Cili është synimi juaj këtë sezon?

Ganiu: Edhe këtë sezon synimi im dhe i lojtarëve është të fitojmë Kampionatin dhe Kupën e Maqedonisë. Aktualisht në garat e kampionatit jemi në vendin e parë, ndërkohë jemi shpallur edhe kampion vjeshtor, ndërsa në Kupë kemi arritur në 1/8 e finales. Jam i bindur se njërën do ta fitojmë, mirëpo nuk shoh arsye përse të mos i fitojmë të dy titujt.

Koha: A posedoni licencë të duhur për të qenë trajner profesionist?

Ganiu: E posedoj licencën A dhe B, ndërsa ajo çka është me rëndësi është se kam magjistruar në Fakultetin e Edukatës Fizike në Universitetin "Shën Kirili" në Shkup në lëmin e futbollit. Ndryshe, kam bërë edhe 26 punime shkencore, të cilat janë të lidhura direkt me futbollin, ndërkohë kam marrë pjesë edhe në simpoziume dhe kongrese të ndryshme në Kroaci, Serbi, Bullgari, Turqi, dhe prej çdo simpoziumi dhe kongresi posedoj certifikatë valide.

Koha: A keni pasur deri më tani ndonjë ofertë të udhëhiqni ndonjë skuadër nga Liga e parë ose e dytë?

Ganiu: Kam pasur ofertë nga një skuadër e Ligës së dytë të cilën e kam refuzuar për shkak se kam dëshirë që këtë gjeneratë ta çoj deri në fund. Dëshiroj që kjo gjeneratë të arrijë të luaj në ekipin e parë të Sllogës dhe besoj se me një përkujdesje më të madhe mund të arrijë sukses të madh. Aktualisht në ekipin e parë të Sllogës të gjeneratës (1990/91) po luajnë dy futbollistë Ermedin Adem dhe Burhan Mustafa si dhe Emir Shabani, i cili u transferua te Rabotnicki Kometalli.

Koha: Cilin trajner e vlerësoni më tepër në kampionatin e Maqedonisë?

Ganiu: Trajnerin të cilin e vlerësoj më shumë është Gjoko Haxhievski, seleksionuesi i Azerbajxhanit dhe trajner i skuadrës së Baku-s. Është një trajner i kompletuar, që ka arritje të mëdha dhe është një njeri shumë i mirë.
Në shtator të vitit të kaluar kam marrë ofertë nga ai që të shkoj të jem asistent i tij te skuadra e Baku, por për shkak të obligimeve që kam në Universitetin e Tetovës (jam asistent) refuzova këtë ofertë. Mirëpo, jemi marrë vesh që bashkëpunimi ynë të vazhdojë në të ardhmen.