Ekspertët e MPJ-ve takohen në Shkup

Marrëveshja e vizave këtë javë drejt versionit final

Shkup, 28 janar - Grupet e ekspertëve të Ministrive së Punëve të Jashtme të Shqipërisë dhe Maqedonisë pritet që këto ditë të takohen në Shkup, për të etabluar marrëveshjen e re për regjimin e vizave mes dy vendeve. Lajmi kumtohet nga MPJ, ku ndër të tjera bëhet e ditur se data e takimit është shumë e afërt.
"Nuk mund të thuhet ende se kur, por do të jetë shumë shpejt, çdo ditë ne jemi në kontakte me kolegët tanë në Tiranë", thotë zëdhënësi Vasko Andonovski. Deri në momentin e konfirmimit zyrtar, hapat e marrëveshjes maqedono-shqiptare, lidhur me lehtësimin e regjimit të vizave nuk do të zbardhen nga asnjë prej zyrave të diplomacisë. Në Ministrinë e Punëve të jashtme të Shqipërisë pohojnë se i përmbahen deklaratës publike të bërë disa kohë më parë dhe deri në momentin e fundit nuk do të zbulojnë as datën e takimit të palëve, por as edhe atë se çfarë është arritur deri tani të negociohet.
"Për aq kohë sa pikat e marrëveshjes janë ende duke u diskutuar dhe palët janë në negociata, ne nuk mund të tregohemi të nxituar dhe të japim deklarata. Mund të thuhet se nuk ka kthim mbrapa dhe jemi në fazën e gjetjes së mundësive të reja për shtetasit e të dy vendeve", thonë në zyrën e MPJ-së në Tiranë. Nga ana tjetër, zëdhënësja e MPJ-së në Tiranë pohon se një takim në nivel ekspertësh për të etabluar marrëveshjen pritet të zhvillohet brenda kësaj jave në Shkup. Takimi i grupeve të ekspertëve pritet të japë edhe versionin përfundimtar të marrëveshjes mes dy vendeve, ose në rast të kundërt, të zgjerojë edhe më tej pistat e çështjes së debatueshme.
Takimi do të zhvillohet në fund të këtij muaji, ose në ditët e para të muajit shkurt, atëherë edhe kur Maqedonia vendosi një periudhë greis për shtetasit shqiptarë dhe duke anuluar vendimin për hyrjen në fuqi më datë 1 janar të ligjit për të huajt.
Burime të sigurta pranë Ministrisë së Punëve të Jashtme konfirmojnë se marrëveshja që është duke u hartuar nga palët do të reduktojë dukshëm vështirësitë për marrjen e një vize maqedonase dhe do të jetë konfrom parimit të fqinjësisë së mirë dhe në favor të kultivimit të marrëdhënieve të mira mes dy vendeve, favorizimit të biznesit, turizmit. Ndërkohë që burime jo zyrtare të MPJ-së bëjnë të ditur se marrëveshja do të ketë shumë lehtësira, do të mundësojë kalimin e kufirit pa u pajisur me viza për disa kategori të caktuara personash, dhënien e vizave afatgjata, çmimi të ulëta të vizave, mënyra e dhënies, e të tjera, ndërsa qëllimi i kësaj marrëveshje është krijimi i një shtrati të atillë të bashkëpunimit që në të ardhmen do të sillte edhe eliminimin e regjimit të vizave mes Shqipërisë dhe Maqedonisë
Vendimi i Qeverisë së Maqedonisë për zbatimin më datë 1 janar të Ligjit për të huajt dhe Rregullores për pajisjen me viza të shtetaseve të huaj, që hynë në fuqi më 23 mars të vitit 2006, alarmoi palën shqiptare, e cila nisi në muajin dhjetor negociatat për zbutjen e pasojave të regjimit.