Nuk do t'u përulem kërcënimeve

Drejtori i shkollës "Nikolla Vapcarov" kundër Komunës së Çairit

Nuk do t'u përulem kërcënimeve

Shkup, 28 janar - Vazhdojnë kontestimet në shkollën fillore "Nikolla Vapcarov" në lagjen Çair të Shkupit. Ndërsa drejtori aktual, Isuf Jusufi, edhe kundrejt kërcënimeve nuk planifikon të largohet nga posti, Komuna e Çairit në vend të tij ka emëruar për ushtruese detyre Merita Koxhaxhikun, arsimtare në të njëjtën shkollë. Sipas drejtorit Jusufi, i gjithë problemi ka ndodhur për shkak se Komuna e Çairit është kundër tij. Ai ka shpjeguar se zgjedhja e tij është bërë nga Këshilli i shkollës, nga i cili ka mbështetje të plotë për ta ushtruar detyrën.
"Zgjidhja e drejtorit bëhet nga ana e Këshillit, i cili gjatë votimit më ka votuar për të qenë drejtor i shkollës. Edhe pse jam i vetëdijshëm për seriozitetin e kërcënimeve për t'u larguar nga posti, tani për tani nuk mendoj të përulem para kërcënimeve dhe presionit të komunës", tha Isuf Jusufi, drejtor i shkollës fillore "Nikolla Vapcarov". Ai ndërkohë është marrë në pyetje nga policia, e cila është duke punuar në zbardhjen e identitetit të dy personave, të cilët të shtunën me pistoleta u gjetën para shtëpisë së tij. Edhe pse nga burime brenda policisë, si autorë të presionit u përmendën disa aktivistë të BDI-së, ai nuk ka dashur të prononcohet rreth kësaj, duke shpjeguar se as gruaja e tij nuk ka arritur të njohë dy personat e armatosur.
Ndërsa drejtori Isuf Jusufi është i bindur se i gjithë problemi buron nga Komuna e Çairit, zyrtarë të komunës kanë hedhur poshtë akuzat dhe kanë shpjeguar se drejtorit i ka përfunduar mandati, prandaj në vend të tij për ushtrues detyre është emëruar, Merita Koxhaxhiku.
"Më 26 dhjetor të vitit të kaluar Isuf Jusufit i ka mbaruar mandati, ndërsa për shkak se komuna bën emërimin e drejtorit të ri, brenda 6 muajsh derisa ai të zgjidhet, emëruam ushtrues detyre", thotë Muzafer Rexhepi, këshilltar arsimi në Komunën e Çairit, duke hedhur poshtë dyshimet e drejtorit Jusufi për presion të ushtruar nga ana e kësaj komune.
Merita Koxhaxhiku, sipas drejtorit Isuf Jusufit me dëshirën e saj ka refuzuar postin e dhënë nga komuna, duke thënë se do të presë zbardhjen e rastit nga ana e organeve kompetente. Koxhaxhiku ka refuzuar të prononcohet rreth rastit.
Ndryshe, të shtunën në mbrëmje para shtëpisë së drejtorit Isuf Jusufi, në rrugën "Dizhon" në Çair, kanë mbërritur dy persona të panjohur dhe të armatosur me pistoleta. Rreth orës 18 ata kanë trokitur në derën e shtëpisë, i cili në ato momente nuk ka qenë brenda saj, ndërsa gruaja nuk ka rritur t'i njohë personat e armatosur.