Kosovarët paralajmërojnë grevë

Shkup, 28 janar - Grevë urie e të burgosurve kosovarë rrezikohet të shpërthejë në burgun më të madh të vendit - në atë të Idrizovës. Të revoltuar nga neglizhenca e institucioneve vendore të drejtësisë, por edhe nga UNMIK-u në Kosovë, këta të burgosur mendojnë se qëllimit për ekstradim në vendlindje do të mund t'ia arrijnë nëpërmjet grevës. Shtetasit kosovarë, të cilët në Idrizovë vuajnë dënime të ndryshme për vepra penale, theksojnë se përkundër kërkesave të njëpasnjëshme për ekstradim, as Ministria e Drejtësisë e Maqedonisë, por as autoritetet e UNMIK-ut në Kosovë nuk janë treguar të gatshëm të zgjidhin këtë problem.
Nexhdet Ramaj nga Istogu i Kosovës, i burgosur në Idrizovë të Shkupit i ka deklaruar gazetës "Koha" se udhëheqësit e burgut disa herë u kanë premtuar të dënuarve kosovarë se do të bisedojnë me autoritetet e UNMIK-ut në Kosovë që të përshpejtohet procedura për ekstradim. "Vetëm po na gënjejnë. Kështu na thanë edhe atëherë kur hymë për herë të parë në grevë, ndërsa tani, nëse e fillojmë grevën, nuk e besojmë se do ta ndalim derisa problemi të zgjidhet", thotë Nexhdeti, i dënuar me 20 vite burg në Maqedoni. Ai thotë se në Idrizovë nuk mund të qëndrojnë më, pasi edhe familjarët e tyre po kanë probleme për vizita.
"Kushtet ekonomike i kemi katastrofale. Deri tani, ardhjen e familjarëve të mi nga Kosova e ka mundësuar Kryqi i Kuq, e cila ua ka paguar rrugën. Këtu nuk mund të qëndrojmë me, përkundër se shumica e të burgosurve jemi pa faj të dënuar, kushtet janë katastrofale dhe dallohemi nga të burgosurit tjerë të Maqedoni", ka thënë Nexhdeti, i cili së bashku me kushëririn e tij, Bedriun vuajnë dënimin për dy vepra të ndryshme penale - njëra për "terrorizëm" dhe tjetra për "rrëmbim". Ai tregon se kërkesë të njëjtë për ekstradim kanë bërë edhe prindërit e tij te autoritetet e UNMIK-ut, po se asgjë konkrete deri tani nuk ka ndodhur.
"UNMIK-u si duket nuk interesohet aspak për qytetarët kosovarë jashtë Kosovës.
Në Maqedoni, menjëherë pas luftës së vitit 2001, autoritetet maqedonase së bashku me disa 'shqipfolësa' na montuan disa krime, të cilët nuk i kam njohur dhe nuk i njoh asnjëherë.
Si pasojë e kësaj, së bashku me kushëririn tim na dënuan me nga 11 vjet burg, që më pastaj të rritet dënimi me nga 20 vjet burg", ka shpjeguar Nexhdeti.
Ndryshe nga Nexhdeti, zyrtarë të burgut të Idrizovës nuk kanë njohuri nëse përgatitet grevë nag të burgosurit kosovarë, por shprehen se vendimi për ekstradimin e tyre varet nga Ministria e Drejtësisë dhe nga UNMIK-u, pasi në vitin 2004, këta dy institucione kanë nënshkruar protokoll ekstradimi ndërmjet vete