Në kohën kur e gjithë bota lufton cigaret

Shkup, 31 janar - Vetëm në vendet evropiane, mbi 19 mijë persona çdo vit vdesin si pasojë e pirjes pasive të duhanit, e cila nënkupton qëndrim në ambiente ku konsumohet duhan. Në dallim prej tyre, shumë më i madh është numri i personave që çdo vit gjejnë vdekjen për shkak të konsumimit aktiv të cigareve. Në nivel vjetor, rreth 5 milionë njerëz vdesin nga duhani. Janë këto të dhëna, të cilat janë prezantuar ditën e fundit të janarit, e cila njëkohësisht është Ditë ndërkombëtare pa cigare dhe ditë kur të gjithë duhanpirësve u bëhet thirrje të heqin dorë prej cigareve, ose të paktën të ulin përdorimin e të njëjtave. Hulumtimet shkencore në vazhdimësi kanë treguar për rreziqet që shkakton duhani, i cili në radhë të parë ndikon në hapjen e kancerit në mushkëri, duke vazhduar me një sërë problemesh të tjera. Komisari evropian i shëndetësisë, Markos Kiprianu, në mars të vitit 2005, në të gjithë vendet evropiane ka filluar fushatën "Help" për jetë pa duhan.
Në Maqedoni, situata me përdorimin e duhanit ndiqet nëpërmjet hulumtimeve dhe nuk ekziston statistikë konkrete, e cila në tërësi do ta tregonte dimensionin e problemit. Në një studim të realizuar në vitin 2005, me të cilin në kryeqytet janë përfshirë 420 të rinj nga 13 deri në 16 vjeç, rezultatet treguan se mbi 21 për qind prej tyre kanë përdorur duhanin, ndërsa rreth 16 ende vazhdojnë ta përdorin. Vetëm 5 për qind të duhanpirësve kanë qenë të mendimit se duhet ta ndalojnë duhanin edhe pse, rreth 83 për qind prej tyre janë të vetëdijshëm për rreziqet prej tij. Në Maqedoni ekziston edhe një hulumtim i realizuar ndaj mjekëve. Sipas tij, 1/3 e mjekëve të anketuar çdo ditë konsumojnë cigare, 39 për qind prej tyre janë meshkuj, ndërsa 30 për qind femra. Mbi 35 për qind e mjekëve të anketuar janë shprehur se çdo ditë konsumojnë mbi 20 cigare. "Në vend nuk ekzistojnë të dhëna konkrete dhe statistika, të cilat në tërësi dhe saktë do të tregonin dimensionin e problemit. Për këtë arsye, të dhënat që mblidhen janë nga organizata të ndryshme joqeveritare", thonë në Entin shtetëror për siguri shëndetësore, në ditën ndërkombëtare pa cigare. Në kohën kur të gjitha shtetet po punojnë seriozisht në uljen e konsumimit të cigareve, organet kompetente në vend harruan Ditën ndërkombëtare pa cigare. As në këtë ditë ato nuk e gjetën të arsyeshme të organizojnë manifestime, nëpërmjet të cilave tek popullata do të ngrihej vetëdija për rreziqet ndaj shëndetit, që shkaktohen prej përdorimit të duhanit.

Maqedonia, konsumatori më i madh i cigareve
Në vitin 2005, në botë ka pasur 1,3 miliardë duhanpirës. Nëse vazhdon trendi i njëjtë, pritet që deri në vitin 2020 në botë të vdesin nga 10 milionë duhanpirës çdo vit.
Sipas shoqatës për preventivë prej alkoolizmit, nikotizmit dhe narkomanisë, kur bëhet fjalë për duhanin, Maqedonia renditet midis shteteve ku situata me keqpërdorimin e duhanit është më alarmante. Sipas statistikave të kësaj shoqate, në Maqedoni rreth 30 për qind e popullsisë janë përdorues të duhanit, ndërsa vet shteti është shpallur si konsumatori më i madh i cigareve, duke u renditur në vend të dytë menjëherë mbas Polonisë.