Tërstena i kthehet dyshemesë

Shkup, 31 janar - Legjenda e mundjes shqiptare, Shaban Tërstena, pas disa vjetësh larg dyshemesë, ka vendosur t'i rikthehet mundjes si anëtar i KM "Tefejuz". Këtë lajm e konfirmoi edhe trajneri i ekipit shkupjan, Nazmi Ali.
"Meqenëse është 15-vjetori i klubit tonë, shpreha dëshirë që Shaban Tërstena të mbrojë ngjyrat tona. Këtë e arrita, pasi bisedova me të dhe menjëherë e regjistrova në Federatën e Mundjes së Maqedonisë", pohoi Aliu. Ndryshe, FMM-ja gjatë ditës së enjte ka njoftuar se ka përfunduar afatin kalimtar. "Më 31 janar ka përfunduar afati kalimtar, kurse ekipet shqiptare këtë herë kanë realizuar disa hapa pozitivë. KM 'Tefejuzi' përveç, Tërstenës, ka marrë edhe 2 mundës nga Radovishi, Shukri Abdiun dhe Ergi Bajramovin. KM 'Liria' ka rikthyer Arsim Zejnullahun, ndërsa klubi i Shkupit ka arritur të përforcohet me mundës të kategorive të reja, të cilët mund t'i kombinojë edhe në Ligën e parë", deklaroi sekretari i FMM-së, Besnik Ejupi.
Nga ana tjetër, sipas burimeve të gazetës KOHA, një ndër ekipet më të mira gjatë viteve të fundit në Maqedoni, "Ballkanec" nga Shtipi, është në prag të shkatërrimit, pasi mundësit aktualë kanë larguar drejtuesit e klubit dhe të njëjtët i kanë marrë vetë duke emëruar për kryetar mundësin Boban Danev.