Banesat e vjetra më shtrenjtë se të rejat

Shkup, 31 janar - "Ethet" për hyrjen e vendit tonë në NATO dhe në BE, kanë ndikuar në masë të madhe në ngritjen e çmimeve të pasurisë së patundshme në vendin tonë.
Ky trend fillimisht filloi me vendet e bllokut ish-komunist që ju bashkëngjitën NATO-s, duke shtrenjtuar disa herë më tepër pasurinë e patundshme në krahasim me vitet e mëparshme. Tani një metër katror në Varshavë është njëjtë me një metër katror në Minhen apo qytete tjera të Evropës. Njëjtë ndodh edhe me shumë kryeqytete të vendeve tjera të Evropës Lindore. Sikur duket, as kryeqyteti i Maqedonisë - Shkupi, nuk mund të mbetet imun ndaj këtyre etheve. Madje për të qenë paradoksi edhe më i madh, në agjenci të ndryshme për pasuri të patundshme, por edhe nëpër shpalljet publike të gazetave, mund të hasen çmime më të larta të banesave të vjetra, në krahasim me banesat e reja.
Edhe pse Shkupi është specifik për nga natyre e çmimeve të banesave, si zakonisht lagjet Çair, Veri, Tophanë dhe Butel, kanë qenë ndër regjionet kryesisht më të lira për të blerë një apartament banimi. Edhe pse në këtë rajon po ndërtohen disa banesa të reja kolektive, çmimi i tyre ndodh të "fryhet" nga shitësit që duan të përfitojnë nga banesat e vjetra.
Nuk janë të pakta rastet, kur për një garsonierë prej 40 metra katrorë në lagjen Çair, pronari kërkon edhe nga 30 mijë euro, domethënë nga 750 euro për metër katror.
Kjo e tejkalon edhe çmimin e ndërtesave të reja. Njohësit e mirë të kësaj problematike, thonë se kjo vjen si rezultat i dëshirës që shitësit të përfitojnë sa më shumë që është e mundur nga malli i tyre, por edhe për shkak të disa keqpërdorimeve apo "piramidave ndërtimore" që u zbuluan kohëve të fundit në vendin tonë në sferën e ndërtimtarisë të objekteve të banimit.
Jo më kot thonë, se për atë që shet, çmimi asnjëherë nuk është i mjaftueshëm, ndërsa për atë që blen, gjithmonë është i shtrenjtë. Sidoqoftë, fuqia blerëse në vend nuk është e përgatitur ta ndjekë një trend të këtyre shtrenjtimeve artificiale që po paralajmërohen se do të ndodhin në të ardhmen e afërt.