Gratë e Shqipërisë kontrollohen falas

Dibër, 29 shkurt - Është shtuar dukshëm numri i pacienteve nga Shqipëria që kryejnë kontrollet gjinekologjike falas në Dibër. Këtë e konfirmon edhe mjekja Sibika Qormemeti, drejtuese e Ordinancës private "Florina Rusi-Marku", e cila thotë se këto paciente kryesisht kryejnë EKO dhe mamografinë, ndërsa nga fillimi i vitit janë 10 sosh. "Numri i femrave që vijnë nga viset kufitare të Shqipërisë për t'i kryer kontrollet në ambulancën tonë dita-ditës po shtohet. Disa prej tyre këtu kanë zbuluar edhe fillimin e sëmundjeve, ndërsa në mënyrë preventive është arritur të merren masat e duhura", thotë mjekja. Manjola Klloboçishta, nga rrethi i Maqellarës, është një ndër pacientet e rregullta që frekuenton Dibrën. "Kontrollet e rregullta i kam bërë dhe vazhdoj t'i bëj në Dibër. Te ne nuk kemi ordinanca të këtilla, ku mund t'i bëjmë kontrollet falas, por duhet që të shkojmë deri në Tiranë, madje me shumë shpenzime", thotë pacientja nga Shqipëria.