Flet zyrtari i ri më i lartë i basketbollit kosovar

Pas shkarkimit të kryetarit të Federatës së Basketbollit të Kosovës dhe Bordit të saj, Komisioni i Përkohshëm, i caktuar nga Kuvendi i Jashtëzakonshëm i së shtunës, që do t’i kryejë obligimet e Bordit të shkarkuar të FBK-së, e ka filluar punën për vazhdimin normal të garave dhe funksionimin e shtëpisë së parë të basketbollit kosovar.
Erolld Belegu, kryetari i Komisionit të Përkohshëm, e pranon se detyrat që dalin para këtij komisioni nuk janë të lehta dhe se i kanë caktuar vetes objektivat që duhet arritur.
“Objektivi i parë dhe kryesor është përfundimi normal i garave në të gjitha kategoritë. Garat për Kupë përfunduan dhe tani kanë mbetur garat e play-offit të Superligës. Në vend të njerëzve të larguar duhet të sjellim njerëz profesionistë, që dinë t’i kryejnë punët organizative. Dhe, sigurisht se një gjë e tillë nuk është një punë e lehtë”, tha Erolld Belegu. “Përgatitja e Kuvendit Zgjedhor të FBK-së, në të cilin do të zgjidhen organet e përhershme është objektivi tjetër. Detyra jonë është që ta dërgojmë federatën në rrugën e funksionimit normal. Ne nuk jemi këtu që ta mësojmë askënd si të luhet basketbolli, pasi me këtë merren trajnerët”, shtoi ai. Belegu, përveç i njohur si afarist dhe njeriu i shou-biznesit, më herët ka qenë ndër menaxherët kryesorë të KB Trepça, ndërsa i ka prirë edhe KB Universitetit (femrat) në garat ndërkombëtare të Trocal Ligës.
Njeriu që i ka marrë përkohësisht në dorë “frenat” e basketbollit kosovar pas largimit të kryetarit dhe Nordit të Federatës së Basketbollit të Kosovës, ka paralajmëruar që në fillim se nuk e ka ndërmend të kandidohet për pozitën e njeriut të parë të basketbollit kosovar.
“Unë nuk kam pretendime të mëtutjeshme për të qëndruar në krye të Federatës së Basketbollit. Nuk kam asnjë pretendim për asnjërin nga postet në Federatë dhe këtë detyrë e kam marrë thjesht nga dëshira për të ndihmuar, siç kam bërë edhe me klubin e Universitetit”.