Basketbollisti i ish-Mabetexit kalon në Ligën hungareze

Moris Haxhija ka nënshkruar marrëveshje njëvjeçare me skuadrën e Ligës së parë hungareze, Bodrogi Bau, e cila sapo ka hyrë nga liga e dytë, dhe të shtunën (nesër) do të debutojë me skuadrën e re. Haxhija (Fundor, 193 cm), i cili kishte oferta nga klubet e tjera hungareze dhe një nga Franca, e ka pranuar ofertën e skuadrës nga qyteti Hodmezovasarhely i Hungarisë.
“Jam shumë i kënaqur me klubin dhe me kushtet që m’i kanë ofruar. Kam qenë në prova te ky klub, kam luajtur një ndeshje me ta dhe kam shënuar 35 pikë. Të shtunën e luaj ndeshjen e parë zyrtare. Liga këtu nuk ka më shumë se dy klube të forta dhe zakonisht lojtarët këtu arrijnë pikë të larta me mesatare mbi 20 pikë”, tha Haxhija nëpërmjet telefonit për “Lajmin”, nga Hungaria. Ai është i treti i huaj te kjo skuadër, ngase pos tij janë edhe një amerikan dhe një serb. “Qyteti është shumë i mirë, po më pëlqen jeta këtu, jam duke u ambientuar mirë”, tha basketbollisti i ish-Mabetexit.
“Si i ka punët ish-Mabetexi, tashmë X Prishtina?”, pyet ai, ndërsa gëzohet pa masë kur dëgjon se bashkëlojtarët e tij së fundi e kanë mposhtur Trepçën, me gjithë kushtet e vështira në klub. “Ata djem e meritojnë edhe kampionë të bëhen. Shumë po më vjen mirë që janë të suksesshëm në këtë periudhë”, tha 26-vjeçari Haxhija, i cili zhgënjehet që është lënë i harruar nga kosovarët, klubet dhe përfaqësuesja.
“Jam zhgënjyer nga Kosova dhe klubet kosovare. Asnjë nuk më ka bërë ofertë. E çka është më e keqja, kam dëgjuar dhe kam parë në internet se është shpallur lista për përfaqësuese. Jam shumë i zhgënjyer me njerëzit atje që nuk më kanë ftuar. Në tre vjetët e fundit kam qenë në top-formë dhe kam qenë shumë më i mirë se 80 për qind e basketbollistëve që janë tani në atë listë”, tha ai. “Unë jam basketbollisti i vetëm shqiptar që luaj në liga evropiane dhe nuk kam pasur as edhe një thirrje, për çka më vjen shumë keq, jam shumë i zhgënjyer. Kjo është marri për ata që e kanë bërë këtë listë. Jam duke u pyetur se çfarë kritere më duhet t’i plotësoj që të hyj në përfaqësuese”, tha ai. Haxhija kishte ardhur në stinorin 2002/03 te Vëllaznimi, skuadër kjo që e kishte ndihmuar të kthehej në Ligën e parë. Pas dy stinorëve kalon te Dukagjini i Pejës dhe arrin në finale, ndërsa stinorin e fundit me Mabetexin arrin po ashtu në finale të play-offit të Siguria Superligës.