Sekretari i përgjithshëm dhe komisari i garave largohen nga

Sekretari i përgjithshëm i FBK-së, Artan Qerkini, dhe komisari i garave, Nazmi Paçarada, kanë dhënë dorëheqje të parevokueshme, megjithëse Kuvendi i Jashtëzakonshëm i FBK-së ua kishte dhënë besimin për ta vazhduar punën, pas shkarkimit të kryetarit dhe Bordit të Federatës së Basketbollit të Kosovës në një kuvend të jashtëzakonshëm, të zhvilluar të shtunën.
“Konsiderojmë se basketbolli kosovar është futur, përfundimisht, në një krizë të thellë institucionale, si rezultat i vendimit të Kuvendit të Jashtëzakonshëm të FBK-së për zgjedhjen e një komisioni prej pesë anëtarëve, që do të marrë kompetencat e Bordit deri në Kuvendin Zgjedhor. Pas një analize të thellë bërë Statutit të FBK-së, konstatojmë se nuk ka bazë statutare që parasheh formimin e një komisioni të tillë”, thuhet në një kumtesë për media që mban firmën e Artan Qerkinit e të Nazmi Paçaradës.
Kryetari i Komisionit të Përkohshëm, Erolld Belegu, i ka quajtur të paarsyeshme arsyetimet e sekretarit të përgjithshëm dhe të komisarit të garave dhe ka paralajmëruar sjelljen e dy njerëzve të tjerë në vendet e tyre.
“Megjithëse nuk kam marrë asgjë zyrtare, kam mbetur i befasuar me këtë, pasi sekretari nuk ka qenë i zgjedhur i Bordit, por ka pasur marrëdhënie pune dhe ka obligime. Por, gjithsesi, ne duhet t’i zëvendësojmë këta njerëz, pasi nuk kemi shumë kohë për të humbur”, tha Belegu.