Federata e Basketbollit e Kosovës e konfirmon udhëtimin në t

Trajneri i Sigal Prishtinës, Arben Krasniqi, është zgjedhur trajner i përfaqësueses së Kosovës, duke e zëvendësuar Bujar Locin, aktualisht trajner i Pejës. Emërimi i Krasniqit në postin e u.d selektorit është ekstrakt i Bordit të FBK-së që po ashtu e ka shkarkuar gjithë stafin e mëparshëm të përfaqësueses së Kosovës, edhe pa paralajmërim.
Krasniqi ka për detyrë ta përgatitë përfaqësuesen e Kosovës për turneun ndërkombëtar të basketbollit në Jordani “Kupa e Mbretit Abdullahu II”, që mbahet për herë të pestë. Është konfirmuar nga FBK-ja pjesëmarrja në turne që mbahet prej16-24 nëntor.
Trajneri Krasniqi pohoi se nuk ka dijeni për këtë informatë dhe se ende nuk di nëse do ta pranojë këtë detyrë të re. “S’kam folur ende me askënd nga Federata dhe nuk di për këtë. Kjo është diçka e re për mua dhe nuk di nëse do ta pranoj apo jo. Së pari do të kërkoj të bisedoj me zyrtarë të Federatës”, tha Krasniqi. “Asnjëherë nuk kam menduar për këtë pozitë dhe është risi për mua. Megjithatë nuk do të jetë diçka shumë e vështirë apo e parealizuar për mua. Përfaqësuesja s’ka angazhime të mëdha, s’ka kualifikime dhe e kisha përballuar këtë detyrë”, tha trajneri i Sigal Prishtinës, me të cilën skuadër kishte fituar stinorin e kaluar kampionatin. Në rast se e pranon këtë post, Krasniqi thotë se do të kërkojë përkrahje nga ekspertët për organizimin e përfaqësueseve.
“Nuk do të ngurroj dhe do të kisha kërkuar edhe përkrahje nga Gjysepe Pino Gjergja, për mënyrat e organizimit të përfaqësueseve, apo edhe nga përfaqësueset e Sllovenisë apo Turqisë, me të cilat kemi marrëdhënie të mira bashkëpunimi”, tha Krasniqi. Ai detyrën në krye të përfaqësueses, por të juniorëve, e kishte provuar dy herë dhe me sukses. Para një viti, me juniorët e kishte zënë vendin e dytë në turneun Grasse të Francës, ndërsa para dy vjetësh si ndihmëstrajner i Mark Rodiqit vendin e parë me juniorët në këtë turne. Njëherësh turneu në Jordani është i dyti për përfaqësuesen e Kosovës në basketboll. Verën e vitit 2005 kishte marrë pjesë në një turne ndërkombëtar në Egjipt, duke e fituar madje turneun, edhe pse Kupa mbeti në Egjipt si pasojë e mashtrimeve nga mikpritësit.

Loci: Nuk di për shkarkim

Trajneri i Pejës, Bujar Loci, i cili deri para shkarkimit ishte u.d. i selektorit të përfaqësueses së Kosovës, është habitur kur ka kuptuar se është shkarkuar nga kjo detyrë. Ai pohon se Bordi i FBK-së nuk ka biseduar me atë më parë. “Besoni nuk kam asnjë informatë për shkarkimin tim, apo të organeve të mëparshme. Këtë po e dëgjoj tani nga ju. Nuk di asgjë, por edhe askush nga federata nuk ka biseduar me mua, së paku të m’i tregojë arsyet e shkarkimit”, tha Loci, i cili e kishte drejtuar përfaqësuesen në Turneun e Egjiptit. Ai megjithatë uron zgjedhjen e Arben Krasniqit. “Por e vetmja e mirë që po shoh këtu është zgjedhja në këtë post e Arben Krasniqit, të cilin e vlerësoj shumë lart si trajner dhe atij e përfaqësueses u uroj shumë suksese”, tha Loci.