Basketbolli më nuk është as sporti i dytë më i shikuar në Ko

Pak kohë më parë mund quhej “budallallëk” vetëm po të mendohej një gjë e tillë, ndërsa sot është bërë e vërtetë. Hendbolli tani më është më i shikuar se basketbolli për nga numri i shikuesve nëpër palestra. Të paktën kështu thonë statistikat e tri xhirove të fundit në dy kampionatet përkatëse. Mesatarja e numrit të shikuesve që i kanë përcjellë ndeshjet e hendbollit në tri xhirot e fundit ka qenë më e madhe sesa e atyre që i kanë përcjellë ndeshjet e basketbollit.
Nazmi Paçarada, komisar i garave në Federatën e Basketbollit të Kosovës, e pranon se shikueshmëria për ndeshjet e dikur sportit më popullor në Kosovë ka rënë, por shpreson se situata të ndryshojë për të mirë në fazën e play-offit të Siguria Superligës së Kosovës në basketboll.
“Besoj se në play-off shikueshmëria do të rritet, pasi skuadrat kanë bërë përpjekje për t’u përforcuar dhe kjo do ta rritë interesimin e shikuesve. Xhirot e fundit është e vërtetë se ka pasur rënie të interesimit, por ndoshta arsyeja është se shumë herët është bërë e ditur se cilat skuadra do të jenë në play-off”, tha Paçarada.
Zyrtarët e Federatës së Hendbollit të Kosovës nuk janë të kënaqur me shikueshmërinë në garat që organizojnë, por edhe ankohen se mediumet nuk i japin shumë publicitet ndeshjeve të hendbollit.
“Ne nuk jemi të kënaqur me këtë fakt, pasi kjo nuk është një shifër e shikueshmërisë së madhe. Por, duke marrë parasysh faktin se hendbolli propagandohet shumë pak në mediat tona, atëherë mund të themi se nuk është keq. Propaganda që bëhet për hendboll në mediat tona nuk është as 10 përqindëshi i asaj që bëhet për disa sporte tjera”, tha Izet Gjinovci, sekretar i përgjithshëm i FHK-së.