Pala e dëmtuar nuk ka të drejtë të deklarohet pas ndonjë in

Skuadrat në basketboll, të cilat e konsiderojnë veten palë të dëmtuar në rast të ndonjë incidenti eventual, nuk kanë të drejtë të japin deklaratë në raportin që e plotësojnë zyrtarët e një ndeshjeje, që janë tre gjyqtarët dhe vëzhguesi i ndeshjes. Ky raport, që i dorëzohet komisarit, është për vendimmarrje. Ekipet vetëm pas vendimit kanë të drejtë t’i deponojnë 500 euro për ankesë.
Superligën në basketboll së fundi e kanë goditur dy raste, incidenti i sulmit të gjyqtarit në Gjakovë dhe largimi i kryetarit të klubit të Dritës, Nexhat Ramadani. Në të dy rastet, zyrtarët e klubeve janë ankuar se nuk e kanë pasur të drejtën e dhënies së deklaratave në raportin e ndeshjes, që përpilohet pas ndeshjes. Komisari i garave të basketbollit, Nazmi Paçarada, tha se raporti i pasndeshjes plotësohet vetëm nga 4 përfaqësuesit zyrtarë (tre gjyqtarë dhe vëzhguesi). “Para 2 vjetësh, për herë të fundit është zbatuar që të jepet deklarata edhe e përfaqësuesve të klubeve”, tha Paçarada. “Në raste të incidenteve, deklaratë jep vetëm lojtari i diskualifikuar. Në rastin në Gjakovë, nuk ka diskualifikim të lojtarit. Të katër zyrtarët e ndeshjes pohojnë për sulm të lojtarit Blerim Kadrija kundër gjyqtarit Arben Lezliu”, tha ai.
Kryetari i klubit gjakovar, Erzen Puka, ishte ankuar se zyrtarët e ndeshjes kanë gabuar në vlerësimin e tyre dhe se nuk është përfshirë deklarata e përfaqësuesit të skuadrës. “Përmbajtja e procesverbalit është befasues dhe përmban të pavërteta”, kishte thënë ai.
Në rastin tjetër, kur kryetari i klubit të Dritës, Nexhat Ramadani, ishte dënuar me 2000 euro për sulm fizik ndaj përfaqësuesit teknik të Sigal Prishtinës, Osman Breca, të katër zyrtarët e ndeshjes janë deklaruar se ka pasur sulm fizik. Edhe pse në shkallën e dytë, Breca ka thënë se as nuk ka pasur sulm, as tentim-sulmi. “Jam dënuar pa argumente. Nuk janë marrë për bazë faktet e mia, por është vlerësuar njëanshëm”, ishte pohimi i Ramadanit, i cili me këtë rast edhe ishte tërhequr nga klubi.
Dhe a është i besueshëm raporti i katër përfaqësuesve zyrtarë të ndeshjes? Komisari i garave tha se derisa nuk vërtetohet e kundërta, vlen pohimi i tyre. “Zyrtarët e Vëllaznimit kanë thënë se në xhirime nuk shihet sulmi, por ata edhe nuk kanë sjellë kundërargumente, për ta vërtetuar të kundërtën. Në rast se vërtetohet e kundërta se zyrtarët kanë gabuar, masat kundër tyre janë më të rreptat”, tha Paçarada.


Popovci: Çka nëse zyrtarët e ndeshjes gabojnë?

Përfaqësuesi i skuadrës së Pejës, Gazmend Popovci, tha se skuadrave duhet t’u jepet e drejta e deklarimit, sidomos në rastet e incidenteve, pas dy rasteve më të freskëta në basketbollin kosovar. “Palës së dëmtuar gjithnjë duhet t’i jepet rasti ta japë edhe ajo deklaratën e vet. Nuk është vendim i drejtë, nëse palës së dëmtuar i mohohet kjo. Çka nëse zyrtarët e ndeshjes nuk kanë pasur të drejtë në vendimin e tyre”, tha Popovci.