Drita në këtë stinor është duke kaluar çaste jo të mira

Skuadra e basketbollit, Drita e Gjilanit, me gjithë telashet financiare do të gjejë forcë që ta kapërcejë edhe këtë situatë jo të lakmueshme, që është krijuar ditëve të fundit në këtë klub gjilanas, ka thënë për “Lajmin”, Rexhep Haziri, zyrtar i lartë i KB Drita.
“Ne do të vazhdojmë punën, edhe pse jemi të vetëdijshëm se do të kemi pengesa dhe vështirësi që të stabilizohemi, por do t’ia dalim edhe kësaj here. Klubi do të ecë përpara dhe s’ka gjasa teorike që të shuhet”, tha Haziri.
Po ashtu edhe Besnik Bekteshi, drejtor i KB Drita ka paralajmëruar se klubi nuk do të shuhet dhe do t’i vazhdojë garat kampionale, pavarësisht nga telashet financiare që janë shfaq ditëve të fundit në këtë skuadër gjilanase. “Na është krijuar një situatë jo e këndshme, por shpresoj se do ta tejkalojmë edhe këtë”, tha Bekteshi.
Pas dorëheqjes së kryetarit, Nexhat Ramadanit dhe largimit të trajnerit Bujar Shehu, që nga e marta nga Drita janë larguar edhe dy basketbollistë nga Maqedonia, aloqendra Slobodanqe Haxhivasilev dhe fundori Enes Salihi. Këtë largim të tyre nga KB Drita e ka konfirmuar edhe zyrtari i Dritës, Haziri. “Po i kemi liruar Haxhivasilevin e Salihin dhe për momentin do të përqendrohemi e bazohemi vetëm në lojtarë vendorë, ngase mendojmë se kemi potencial të mjaftueshëm që edhe më këtë fond të lojtarëve të futemi në plejof, e më pas do të shohim”, tha Haziri, duke bërë me dije se Drita në plejof sërish do të përforcohet më legjionarë.
Sipas Hazirit, Bordi i Klubit shumë shpejt do të mblidhet dhe do të merr qëndrime të qarta
“Çfarëdo vendimi që do të merret në takimin e Bordit, ai do të jetë valid për të gjithë ne”, ka deklaruar Haziri.